РСБСП со апел до мотоциклистите - минатата година загинале 13 лица

Републичкиот совет за безбедност на сообраќајот на патиштата (РСБСП) апелира мотоциклистите секогаш да носат заштитен шлем (кацига), да внимаваат на брзината, да ги користат трепкачите, да одржуват растојание, да ги користат двете сопирачки, да избегнуваат „мртви агли“ и да носат рефлектирачки елек и заштитна опрема.

РСБСП на почетокот на сезоната за мотоциклисти ги потсетува мотоциклистите да бидат внимателни и одговорни во сообраќајот, да внимаваат на правилата за ограничување на брзината и да користат кациги и останата заштитна опрема за пасивна безбедност. Исто така, апелира и до другите учесници во сообраќајот да внимаваат на мотоциклистите и да ги почитуваат како рамноправни учесници во сообраќајот.

- Посебно апелираме до родителите да не подлегнуваат под притисокот и барањата на своите деца, да не им овозможуваат „опасни играчки“ без претходно да им обезбедат основни знаења и способности за правилно и безбедно учество во сообраќајот. Мотоциклистите спаѓаат во групата на учесници во сообраќајот кои најмногу се изложени на опасности во сообраќајот и кај кои ризикот за здобивање на смртоносни повреди во случај на сообраќајна незгода е исклучително висок, велат од РСБСП.

Во 2016 година, додаваат, од 165 загинати лица во сообраќајни незгоди, 13 се мотоциклисти, а двајца се патници на мотоцикл.

- Ако се земе во предвид делот од сообраќајот кој им припаѓа на мотоциклистите тогаш можеме да заклучиме дека учеството на мотоциклистите во вкупниот број на загинати лица во сообраќајни незгоди е несразмерно висок во однос на тоа во колкав дел од сообраќајот тие учествуваат, нагласуваат од РСБСП.

Оттаму потсетуваат дека законските прописи ја предвидуваат обврската за задолжително користење на заштитна шлем (кацига), како за возачот така и за сопатникот и непочитувањето на оваа одредба предвидува санкција од 50 евра во денарска противвредност.

- Секој кој се превезува на мотор треба да знае дека користењето на заштитна кацига го намалува ризикот од здобивање на смртоносни повреди на главата и во исто време штити од ветар, прашина, дожд односно овозможува мотоциклистот безбедно да управува со возилото, потенцираат од РСБСП.

Од РСБСП додаваат дека и користењето на останатата заштитна опрема како што се заштитна јакна, заштитна облека, заштитно елече, и други додатоци (чизми, наочари, кожни панталони, ракавици, итн.) се исклучително важни за безбедноста на мотоциклистите и лицата кои се превезуваат на мотоцикл, но нивното користење не е задолжително со Законот за безбедност на патниот сообраќај, односно користењето на оваа заштитна опрема е препуштено на свеста и одговорноста на мотоциклистите и за жал истата многу често не се користи.

РСБСП препорачува на почетокот на пролетната сезона секој мотоциклист да го замени маслото и филтерот и да ја провери течноста за ладење на моторот, да го исчисти или замени филтерот за воздух, да ги провери сопирачките и течноста во сопирачките (глицеринот), да го провери притисокот на воздух во гумите и дебелината на шарата на гумите, да го провери и наполни акумулаторот., да ги прегледа конзолите и да го подмачка синџирот, да ги провери сите светла/сијалички и да провери дали гаста, кумплугот и сопирачките функционираат правилно.

Според Законот за безбедност на сообраќајот на патиштата, секој возач на мотоцикл треба да знае дека движењето во група треба да биде еден позади друг, носењето заштитен шлем на главата за време на возењето на мотоцикл е задолжително за возачот и сопатникот, при вклучување на јавен пат или на друга сообраќајна површина, кога мотоциклистот се вклучува во сообраќајот од гаража, двор или друга слична површина, ако видикот му е закриен со друго возило, објект или предмет или ако видливоста му е намалена возачот на мотоцикл тоа треба да го направи со туркање, а не со возење. Покрај тоа, возачот на мотоцикл не смее со мотоциклот со кој управува да преминува преку пешачки премини и пешачки патеки, а со тоа и да ја загрозува безбедноста на пешаците, не смее да биде под дејство на алкохол или да превезува лице кое е под дејство на алкохол, не смее да превезува дете помало од 12 години, не смее да пренесува предмети пошироки од еден метар.

Возачот на мотоцикл е должен да управува со возилото на начин на кој не се намалува стабилноста на возилото и не се попречуваат другите учесници во сообраќајот, а особено не смее да ги симнува рацете од управувачот, да се придржува за друго возило, да превезува, влече или турка предмети што можат да го попречуваат во управувањето со возилото или да ги загрозуваат другите учесници во сообраќајот. Полицискиот службеник на самото место привремено ќе му ја одземе возачката дозвола и ќе го исклучи од сообраќај возачот на мотоцикл кој управува со мотоцикл без заштитен шлем и кога лицата кои се превезуваат не носат или одбиваат да носат заштитен шлем за време на возењето на патот.

 

 

 

28.03.2017 - 11:18

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега