СДСМ: Пописот ќе ја регистрира реалноста таква каква што е- резултатите нема да значат суспендирање нечии права
Пописот на населението е од клучно значење за развојот на државата, за граѓаните, а по него ќе може да се креираат мерки и политики кои одговараат на вистинските потреби на народот – економски, здравствени, образовни, социјални, културни, со што ќе се унапредат и нивните права и придобивки, велат преку соопштение од СДСМ.
„Немањето попис цели две децении е штетно. ВМРО-ДПМНЕ го прекина последниот обид за попис во 2011 и тоа го направи откако потроши милиони евра народни пари, а сега, како и при сите клучни работи во државата бара причини за блокади и опструкции и се обидува да го саботира целиот процес.
Губитникот Христијан Мицкоски и неговото ВМРО-ДПМНЕ делуваат спротивно на интересите на граѓаните и на државата, шират невистини и оспоруваат резултати на уште неспроведен попис и ги повикуваат граѓаните на прекршување на законите.
Штетни се обидите за наметнување дебата колку проценти е било која етничка заедница. Пописот ќе ја регистрира реалноста таква каква што е, а резултатите нема да значат суспендирање нечии права.
Пописот е статистичка операција, која ќе ја реализира Државниот завод за статистика, според сите европски стандарди, во интерес на граѓаните и на државата.
Времето на политикантски калкулации и хирови на Мицкоски заврши, интересот на граѓаните и на државата сега е на прво место.
Со СДСМ државата по 19 години, на пролет конечно ќе добие попис спроведен по сите меѓународни стандарди“ се вели во соопштението на СДСМ.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа