СДСМ се оградува од конструкции за нерегуларности на изборите: Граѓаните денес се заштитени

СДСМ во целост се оградува од какви било нерегуларности или конструкции за нерегуларности за овие избори. СДСМ води искрена, приземјена, отворена и јавна комуникација со граѓаните и ги отфрла сите обиди со кои наводни вибер групи би требало да докажат дека СДСМ се занимавал со следење луѓе на денот на избори, реагира владејачката СДСМ по прес-конференцијата на членот на Извршниот комитет на ВМРО-ДПМНЕ, Драган Ковачки.

Тој на прес-конференција обвини дека полициски службеници организирани во група на социјална мрежа договарале малтретирање на луѓе кои не се членови на СДСМ.

Од владејачката партија велат дека граѓаните денес се заштитени и преку институциите и преку севкупниот амбиент.

-Тоа време заврши пред четири години, тоа е времето на МВРО-ВМРО од кое граѓаните денес се заштитени и преку институциите и преку севкупниот демократски амбиент. Граѓаните од 2016 година наваму гласаат слободно, а сите четири изборни циклуси од тогаш наваму, како и референдумот, се потврдени како целосно слободни, фер и демократски.  Во пресрет на вториот круг се засилува Центарот за манипулации на ВМРО-ДПМНЕ, граѓаните на 31 октомври масовно ќе излезат на гласање и со демократски методи ќе спречат враќање на режимот и злоупотреба на институциите во партиски цели. Сепак, за и овој куп лаги на ДПМНЕ да распука како меур од сапуница, бараме од институциите итна постапка и расчистување на овој случај. Јавноста треба да знае дали било која институција креирала таква група и дали наводните дејствија презентирани на прес-конференција било кога реално се случиле, се вели во реакцијата.