Се поизвесно дека невролог ќе го замени Сали во здравство
Неврологот Фатмир Меџити станува се поизвесен нов министер за здравство на местото на актуелниот министер од Алтернатива, Беким Сали.
Иако досега како прва опција за нов министер за здравство, откако ќе биде проширена владината коалиција со Алијанса за Албанците, се спомнуваше инфектологот Фадил Цана, извори од партијата за „Макфакс“ посочуваат дека тој, како предлог, е заменет со неврологот Меџити.
Лидерот на Алијанса за Албанците, Арбен Таравари не одговори на повиците и на пораките од „Макфакс“ за да потврди или негира дека Меџити е неговото ново решение за министер за здравство.
Неврологот Меџити, како можен министер за здравство неофицијално се споменуваше и во 2017 година. Тогаш неговото име циркулираше како можен наследник на Таравари, кој како неколкумесечен министер за здравство, беше избран за градоначалник на Гостивар, но ресорот го зема СДСМ и за министер беше назначен Венко Филипче.
Таравари и Меџити на социјалните мрежи имаат заеднички фотографии.
Инаку, вечерва СДСМ и Алијанса за Албанците имаат партиски состаноци на кои очекуваат да се прецизираат кадровските решенија.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
