Столтенберт до членките на НАТО: Давајте и повеќе оружје на Украина

Генералниот секретар на НАТО, Јенс Столтенберг, ги повика земјите-членки на НАТО да достават повеќе оружје за Украина, се вели во интервјуто објавено во петокот.

– Ги повикувам сојузниците да направат повеќе. Во безбедносен интерес на сите е да обезбедиме Украина да победи, а Путин да не победи – изјави Столтенберг за германската новинска агенција ДПА.

Тој рече дека можеби уште поважно е Украина да добие доволно муниција за постоечките системи за оружје, додавајќи дека потребата за муниција и резервни делови е „огромна“.

Минатата недела, украинскиот претседател Володимир Зеленски, во обраќањето до група западни лидери, побара широк опсег на оружје и системи за противвоздушна одбрана за да помогнат во спротивставувањето на руската инвазија.

САД, исто така, објавија речиси 2 милијарди долари дополнителна воена помош минатата недела, вклучувајќи го и системот за воздушна одбрана Патриот, кој нуди заштита од авиони, крстаречки и балистички ракети.

Столтенберг во интервју од седиштето на НАТО за ДПА изјави дека воената поддршка за Украина е најбрзиот пат за мир.

– Знаеме дека повеќето војни завршуваат на преговарачката маса – веројатно и оваа војна – но знаеме дека она што Украина може да го постигне во овие преговори нераскинливо зависи од воената ситуација – рече тој.

Русија ја нападна Украина на 24 февруари во, како што рече, рускиот претседател Владимир Путин „специјална воена операција“ против она што тој го гледа како закана за руската безбедност.