Студентите можат да примат вакцина против коронавирусот и во вакциналниот пункт на УКИМ

Вакционалниот пункт на УКИМ веќе втор ден им дава можност на студентите да примат вакцина против КОВИД-19.  Истиот е сместен во Кампусот на општествените науки на приземјето на Економскиот факултет во Скопје, на бул. „Гоце Делчев“ бр.9. Студентите имаат можност да се вакцинираат секој работен ден, од 8:00 до 14:00 часот.

„Во него работат обучени лица, двајца доктори и две сестри од Поликлиниката на Универзитетот „Св. Кирил и Методиј“ во Скопје. Просторот е снабден со информатичка, како и медицинска опрема согласно постојниот протокол и потребите“ – се вели во писменото соопштение на УКИМ.

Согласно направените статистики на надлежните органи, младите граѓани се оние кои во моментов се најизложени на коронавирусот и истите се главни медијатори, поради својата меѓусебна комуникација.

„Знаеме колку им се промени животот во изминатиот период со тоа што немаа социјални контакти, со тоа што не одеа во училиште и затоа и за помладите важи правилото дека само со вакцинација може да ги нормализираат целосно животите. И затоа сега ставаме акцент на промоцијата, на повикот кон помладите да се вакцинираат“- потенцираше министерот за здравство Венко Филипче во својата изјава за медиумите, најавувајќи го отворањето на овој вакцинален пункт.