ВМРО-ДПМНЕ: Македонија станува презадолжена земја со СДСМ и Ковачевски

СДСМ и Ковачевски ја продолжија црната слика за македонската економија оставена од Зоран Заев, обвинуваат утрово од опозициската ВМРО-ДПМНЕ.

Од ден во ден, од месец во месец, од година во година, велат тие, државата била се позадолжена и фрлена на колена.

„Македонија станува презадолжена земја. Без капитални инвестиции, со минимален раст на БДП, а парите на граѓаните се трошат само за непродуктивни трошења, криминални тендери и богатења на функционерите на СДСМ и ДУИ.

Со новото задолжување кое е предвидено од страната на оваа криминална власт на СДСМ и ДУИ, државниот долг ќе го достигне историскиот врв од 7.8 милијарди евра.

За само 3 години оваа власт, под превезот на изгласаните кризи во државата се задолжи за неверојатни 2.3 милијарди. А, со тоа секој граѓанин за само 3 години го задолжија за нови 1.250 евра.

Кризи со кои се справивме најкатастрофално во Европа, но и во регионот. Како со здравствената, каде што најубедливо сме најлоши, така и со економската каде што имаме најмал БДП од земјите во регионот за последните 2 години.

Сега новото задолжување го оправдуваат со енергетската криза како и последиците од војната во Украина. И повторно заради лошото справување и менаџирање на кризите“, се наведува во писмената реакција на опозициската партија.

Оттаму додаваат дека се поголем бил бројот на затворени фирми, компании и отпуштање на вработени, поради задоцнетите или нецелосните мерки, како што велат, од страна на оваа криминална власт.

„Инфлацијата секојдневно го јаде стандардот на граѓаните, а Владата на СДСМ и ДУИ со прст не мрда да им помогне на граѓаните.Јасно е дека оваа власт е тотално неспособна да се справи економските предизвици и за подобрување на стандардот на граѓаните.

Македонската економија е целосно уништена. Оваа неспособна и криминална власт мора да замине што поскоро, а за тоа се потребни брзи предвремени избори“, додаваат од ВМРО-ДПМНЕ.