ВМРО-ДПМНЕ: На Онкологија немало софтверски увид на дистрибуција на лекови
„Дивото месо го уништува здравството во Македонија. Тоа е канцер мафијата која на сметка на животите на најтешките пациенти, правела милионски бизниси на клиниката за Онкологија. Свесно бил допуштан башибозлук на оваа институција со цел некој да се богати, да се краде на ангро, а граѓаните да бидат оставани без својата терапија и без термини за лекување“. Овие пораки утрово ги испраќаат од опозициската ВМРО-ДПМНЕ во однос на скандалот што ја тресе Онкологија, за каде има сомнение дека доктори се богателе на грбот на најтешко болните пациенти.
„Прво, КАТО системот кој бил набавен во 2016-та требало да ја следи потрошувачката и дозирањето на скапите лекови. Но овој систем бил исфрлен од употреба веднаш по доаѓањето на власта на СДС и ДУИ и истиот бил фрлен во помошна просторија за да фаќа прашина цели 7 години. Логичен е сомнежот е дека тоа е направено за да може да се краде. Софтверското решение овозможува увид на каналот на дистрибуција на лековите и излезот кон одделенијата и истото го немало за на тој начин лековите да завршуваат на црниот пазар.
Во исто време во дневната болница не постоела можност да се евидентира која сестра кој лек на пациент го аплицирала, што пак отвора можност за злоупотреби, неточна и непрецизна евиденција за терапија која чини илјадници евра“, стои во партиското соопштение испратено утрово до медиумите.
Сето ова и многу повеќе било содржано во извештајот од финансиската контрола на клиниката за онкологија.
„Здравствените власти ова го знаеле но го дозволувале. Оваа состојба не може да постои ако не била аминувана од страна на највисоките функционери во здравството. Ова е организирана шема. Ова е канцер мафија и мора да има одговорност“, додаваат од партијата.
08.11.2023 - 09:19
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
