ВМРО-ДПМНЕ: Неспособноста на владата предводена од Заев удри по грбот на граѓаните, за 5 месеци останаа околу 36.000 граѓани на улица

Неспособноста на владата предводена од Зоран Заев удри по грбот на граѓаните, велат од ВМРО-ДПМНЕ.

Според партиајта, во ек на корона криза  за 5 месеци околу 36.000 граѓани останале на улица.

-Ова го укажува и истражувањето на „Рефлектор“ кое ги има истражувано податоците на Агенција за вработување. Според податоците на Агенција за вработување, кон крајот на август, 36.362 повеќе лица бараат работа, за разлика од крајот на март кога веќе се затвораа локалите како мерка против пандемијата на коронавирусот. Резултатите покажуваат дека доколку во април Агенцијата за вработување регистрирала 107.732 лица кои активно барале работа, кон крајот на август бројката на лица кои бараат работа е во пораст и изнесува 144.094 лица. Со податоци на Агенција за вработување, во април и мај се зголемил бројот на невработени лица за 12.297, се вели во писменото соопштение од ВМРО-ДПМНЕ.

Според партијата, над 500.000 граѓани живеат на раб на егзистенција, со 40-тина денари на ден.

-Податоците исто така укажуваат дека во февруари просечната плата изнесувала 27,206 денари, во март се забележува намалување од 784 денари, па мартовската просечна плата изнесува 26.422 денари. Сепак, трендот на намалување продолжува и во април со намалување од 592 денари и априлската плата е сведена на 25.830 денари. Со тоа, разликата помеѓу платите во февруари и април изнесува 1376 денари, велат од опозицијата.

Во соопштението се вели дека власта наместо да се залага да го подобри животот на граѓаните, се залага за полнење на нивните џебови.

-Во ек на пандемија оваа криминогена власт се дрзна да ја поскапи цената на струјата за 7,5%, со што народот ќе го плаќа недомаќинското работење на енергетските компании од кои Заеви на различни начини испумпуваат милиони евра. Неспособноста на власта се гледа и по пропаѓањето на Еуростандард Банка. Според извештаите по пропаѓањето на оваа банка само околу 10 проценти од лицата успеале да отворат сметки во други банки, што значи дека околу 90.000 граѓани ќе останат без своите пари наредниот месец. Оваа влада е со краток рок на траење. Од нејзе можеме да очекуваме само неуспеси и разочарувања, се вели во соопштението од ВМРО-ДПМНЕ.