ВМРО-ДПМНЕ: Огромен скандал е што истражители на АНБ вршеле рекет на бизнисмени
Огромен скандал е што истражители на Агенцијата за национална безбедност (АНБ) вршеле рекет на бизнисмени, реагираат од ВМРО-ДПМНЕ на акцијата која се спроведува во Скопје против уценувачи на бизнисмени, а во која според неофицијални информации, меѓу приведените има и вработен во АНБ.
„Прашањето е што барале вработени во АНБ да соработуваат за рекет со криминалното подземје? Заевизмот и луѓето од власта партискиот рекет кој го видовме со Катица Јанева го претворија и во државен рекет овој пат со Агенцијата за национална безбедност. Зошто АНБ наместо да се грижи за националната безбедност се грижи и врши рекет на бизнисмени? Кои луѓе од власта на Заев се вмешани во овој скандал? И зошто нема одговорност за челните луѓе од АНБ?“, велат од ВМРО-ДПМНЕ.
Според извори од истрагата, акцијата ја спроведува Основното јавно обвинителство (ОЈО) – Скопје, но досега за акцијата не се огласија ниту од обвинителството ниту МВР.
Неофицијално, покрај вработениот во АНБ, приведен бил и еден од амнестираните за настаните од 27 април 2017 година во Собранието. Тој беше обвинет за терористичко загрозување на уставниот поредок и безбедноста, но потоа беше амнестиран бидејќи беше во групата обвинети кои директно не учествувале во насилствата.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа