Заев се огласи за полициската бруталност во Битола: Таквото однесување е срамно за полицијата

Премиерот Зоран Заев денеска преку социјалната мрежа Фејсбук се огласи за полициската бруталност во Битола врз неколку Роми, за што вчера беше објавено видео.

-Бруталноста од страна на полициски службеници врз граѓани Роми, што ја видовме вчера во видеото на социјалните мрежи, е за најсилна осуда. Таквото однесување е срамно за полицијата, ја заслужува осудата која пристигна од јавноста, напиша Заев.

Ја повика внатрешната контрола во МВР да го расветли случајот.

-За поздравување е што Одделот за внатрешна контрола, криминалистички истраги и професионални стандарди при Министерството за внатрешни работи го утврди идентитетот на учесниците на овој исклучително немил настан, и очекувам дека многу бргу, по утврдените околности да следува целосна одговорност и соодветна казна на сите инволвирани во случајот. Вложивме многу во менувањето на ликот и однесувањето на полициските службеници и нема да дозволиме, дури и вакви изолирани случаи, да поминат без одговорност и соодветна казна, напиша Заев.