Газа на работ на катастрофа: Најмалку 27 Палестинци убиени додека чекале помош – Израел ги прогласи патиштата за „борбени зони“

Израелската армија ги предупреди жителите на Газа да не патуваат низ областите што водат до центрите за дистрибуција на помош откако најмалку 27 Палестинци беа убиени од израелски оган додека чекаа храна на контролните пунктови поставени од фондација поддржана од САД.

Портпарол на израелската армија во вторникот изјави дека патиштата што водат до центрите поставени од Хуманитарната фондација Газа (GHF) се сметаат за „борбени зони“.

GHF објави на социјалните мрежи дека нејзините точки за дистрибуција на помош ќе бидат затворени во среда за „ажурирање, организирање и подобрување на ефикасноста“. Не беа дадени дополнителни детали за планираните подобрувања. Организацијата објави дека операциите ќе продолжат во четврток. Таа, исто така, изјави дека е во преговори со израелската армија за подобрување на безбедносните мерки надвор од непосредната зона на нејзините контролни пунктови.

Министерството за здравство во Газа објави дека 27 лица биле убиени во вторникot наутро додека чекале помош на еден од контролните пунктови на GHF.

„Силите испукале предупредувачки истрели, а кога лицата не се оддалечиле, биле испукани дополнителни истрели кон поединечни сомнителни лица кои се движеле кон војниците“, се наведува во соопштението. „Тие лица се движеле на начин што претставувал закана за силите“, се додава во соопштението, без да се прецизира за кого станува збор.

Портпаролот на GHF, организацијата која ја презеде дистрибуцијата на храна во Газа и е поддржана од Израел, изјави за агенцијата АП дека фондацијата „со жалење дознала дека неколку цивили биле повредени и убиени откако го напуштиле назначениот безбеден коридор“.

Високиот комесар на ОН за човекови права, Фолкер Турк, ги опиша „смртоносните напади“ врз цивилите околу пунктовите за помош како воено злосторство.

„Смртоносните напади врз очајни цивили кои се обидуваат да добијат минимална хуманитарна помош во Газа се незамисливи. Нападите врз цивилите се сериозно кршење на меѓународното право и воено злосторство“, рече Турк.