Д-р Митов за РСМ: Заблуда е дека здравиот начин на живот е скап

Здравиот начин на живот нема да ги чини многу пари граѓаните, напротив ќе заштедат. Советникот на премиерот за здравство, Александар Митов кој беше денешен гостин во емисијата “Кворум” со Бојана Димитријевска, вели дека постои заблуда околу здравата исхрана и вежбањето кога станува збор за тоа колку би потрошиле граѓаните. Голема е заблудата вели тој дека здравата храна е само органска храна.

Напротив медитерсанксата исхрана е докажано најздрава, потенцира Митов, а македонската традиционална храна малку се разликува од неа.

Со советите кои ги дава Владата за здравјето на луѓето, ќе треба и нешто да се намали од исхраната, а не само да се додаде. Пример во нашите кујни секојдневно е застапено месото, кое е еден од поскапите прехранбени продукти. А токму месото е еден од најчестите причинители за развивање на карцином на дебелото црево. За да бидете физички активни не треба да одите во теретана, доволно е само 30 минути дневно пешачење низ населба, порачува Митов.

Советникот на премиерот кој е директно вклучен во кампањата потсетува дека ваквите кампањи Светската здравствена организација ги препорачува на сите земји членки на ООН, од најбогатите до најсиромашните.