Груевски и Рикер задоволни од пријателските односи на Македонија и САД

Македонскиот премиер Никола Груевски денеска оствари средба со Филип Рикер, заменик помошникот на државниот секретар на САД задолжен за европски и авроазиски прашања. На средбата се зборувачп за билатералната соработка, како и евроатланската и европската интеграција на Република Македонија.

Од Владата информираат дека Груевски и Рикер искажале задоволство од континуираното унапредување на пријателските односи и интензивната соработка меѓу двете држави на секое ниво од взаемен интерес.

Во однос на евроатланската интеграција на Република Македонија, биле истакнати чекорите кои се преземаат во повеќе сфери за унапредување на процесите и стандардите, со осврт на унапредување на политичкиот дијалог во земјата.

Беше истакната посветеноста и одговорниот пристап за надминување на предизвиците на надворешно-политички план, стои во соопштението, а станало збор и за регионални прашања.

- Соговорниците разменија мислења и за регионалните случувања, настани, предизвици и перспективи, и оценија дека сите субјекти во регионот треба да дејствуваат во интерес на засилување на регионалната соработка и обезбедување на стабилизација, напредок и развој на Југоисточна Европа, се наведува во соопштението.

Рикер денеска се сретна и со претседателот на државата Ѓорге Иванов. Попладне тој треба да се сретне со лидерот на опозициската СДСМ Зоран Заев. Вчера, пак, тој разговараше со Теута Арифи градоначалник на Тетово и член на раководството на ДУИ.

Посетата на заменик помошникот на државниот секретар на САД задолжен за европски и евроазиски прашања Рикер на Македонија е по повод конференција на Јадранската група, која треба да се одржи утре во Скопје.

ФОТО: МИА

најчитано сега