Кастратовиќ: Со полна сала до победа

Тренерот на македонскиот ракометен шампион ЖРК Вардар упати апел до навивачите в сабота да ја исполнат салата во СЦ „Јане Сандански“ и да им помогнат на „црвено-црните“ на првиот четвртфинален меч од Лигата на шампионите против унгарски Ѓер.

- Работевме квалитетно и подготвени и без повредени играчи го очекуваме дуелот со Ѓер. Го познаваме противникот, знаеме дека се европки шампиони, но сега доаѓаат во Скопје и затоа не треба да размислуваме за ништо друго. Како и секогаш пак ќе повторам дека најважна е одбраната и најважно е какви ќе бидат почетните минути. И повторно ќе ги повикам сите љубители на ракометот да дојдат. Знаеме сите како е кога е полна салата, а како е кога не се исполнети трибините. Ова ни е најважен меч оваа сезона и затоа се надевам дека ќе ги усреќиме сите во Македонија, изјави Кастратовиќ.

Две од вардаровиот состав порано го носеле дресот на Ѓер и го знаат системот на функционирање таму. За Андреа Лекиќ воопшто не е важно што противникот доаѓа ослабен, со четири, пет повредени ракометарки.

- Јас и Јованка Радичевиќ бевме дел од оваа машинерија. Тоа е состав кој трета година го води Амброш Мартин и сигурно дека се фаворити, но ние очекуваме позитивен резултат. Сега сите зборуваат за повредените играчи на Ѓер, но ние не се оптоваруваме со тоа. Атмосферата во Скопје е одлична и на ниту една екипа не ѝ е пријатно да гостува овде, верувам дека така ќе биде и со Ѓер. Имав можност да ја почувствувам атмосферата кога играа мажите и се надевам дека и ЖРК Вардар ќе има таква поддршка, затоа што ова е најважниот меч за нас оваа сезона, изјави Лекиќ.

Натпреварот почнува во 19 часот.