За 3 години модернизирани 90 километри патишта во тетовско- инвестирани 11 милиони евра

Во делот на патната инфраструктура во тетовскиот регион изминативе 3 години беше извршена изградба, реконструкција и модернизација на над 90 километри локални и регионални патишта. За тоа, Владата инвестираше повеќе од 11 милиони евра.

-Само во Тетово, изминатава година беа инвестирани 4,5 милиони евра за реконструкција и модернизација на 30 километри локални и регионални патишта, истакна премиерот Никола Груевски на народниот собир кој во саботата се одржа во Тетово и од таму најави дека во периодот што следи, ќе продолжат инвестициите во подобрување на патната инфраструктура во Полог.

Во идниот период во тетовско ќе се инвестираат повеќе од 2 милиони евра за реконструкција и надградба на 20 километри пат, меѓу кои и надградбата на коловозот Тетово- Попова Шапка, која ќе започне во мај или јуни.

Ќе се рехабилитира и регионалниот пат Тетово- Брвеница- Чегране- Гостивар во должина од 16,5 километри и инвестиција од 2 милиони евра која ќе започне летово.

-Во април-мај ќе ја започнеме и втората фаза од рехабилитацијата на патна делница Тетово-Пирок-Гостивар во должина од 10 километри. Се работи и реализација на инвестиции од 1 милион евра за реконструкција на 2 пата и автопатска клучка во Брвеница, потенцираше Груевски во саботата од Тетово.

Започнати се и тендерските процедури за реконструкција на три пата во гостиварско и санација на мостот на магистралниот Гостивар- Стража, инвестиција во висина од 1,5 милион евра.

-Откако ги завршивме градежните работи во висина од 3 милиони евра на делниците Гарски мост- Бошков Мост и Маврово- Дебар, летово започнуваме и со реконструкција на регионалниот пат Ново Село- Маврово- Жировница- Дебар во должина од 20 километри во вредност од 8 милиони евра. Реконструкцијата ќе заврши за една година, додаде претседателот на македонската Влада.

Ова се само дел се проектите кои се од значење за сите жители од тетовскиот регион.