Аудито на Заев се судрило со пунто – шестмина повредени
Сопругата на возачот на лидерот на СДСМ, Зоран Заев и уште пет лица се здобиле со телесни повреди во сообраќајна несреќа што се случила утрово околу 9 часот во Струмица, објави Макфакс.
Според информациите од МВР, сообраќајката се случила на раскрсницата „Климент Охридски“ и „Братство и единство“, кога се судриле автомобил „фиат пунто“ со штипски регистерски таблици и „ауди“ со струмички регистерски таблици, во кое што биле возачот на Заев, неговата сопруга и уште двајца сопатници.
Во сообраќајката со телесни повреди се здобиле возачот на „фиат пунтото“, дваесет и петгодишниот В.М., неговата врсничка С.Г. и триесет и двегодишниот сопатник З.М. сите од Радовиш.
Возачот на „аудито“, шоферот на Заев, не се пожалил на повреди додека неговата сопруга, педесет и тригодишната Ј.А., шеесет и едногодишниот сопатник Д.К.и уште една сопатничка се здобиле со телесни повреди.
Повредените се пренесени во струмичката болница каде им била укажана лекарска помош. Извршен е увид на лице место и се утврдуваат причините за несреќата.
Автомобилот „ауди“ бил на лизинг и не се води ниту на име на општина Струмица, ниту на име на физичко лице, објави Макфакс.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа