Расте довербата на граѓаните во полицијата - Чавков во посета на „Тоде Ментол"

Министерот за внатрешни работи Митко Чавков и директорот на Бирото за јавна безбедност Горанчо Савовски денеска имаа средба со жителите на населбата „Тоде Мендол“, каде на 9 и 10 мај се одвиваше полициска акција за сузбивање криминално-терористичка група, со претставници на СВР Куманово, на граѓански орагнизации и Исламската верска заедница. 

- Разговаравме и отворивме прашања и теми од заеднички интерес, а тоа е безбедноста на заедницата и од друга страна почитувањето на фундаменталните права и слободи на човекот и граѓанинот, изјави министерот.

Чавков и кумановци разговарале за јавниот ред и мир, за сообраќајот, конвенционалните безбедносни форми кои секојдневно ги засегаат и граѓаните и полицијата, како и за неконвенционалните форми на криминалитет, присутни на светско ниво, како што се променливите форми на радикализација, насилство и тероризам.

- Во тој контекст го отворивме и прашањето на случувањето во Куманово. Очекувам отворена дискусија и за овие проблеми и практично и граѓаните и ние како полиција сме упатени едни на други и во навремено согледување на ризиците кои упатуваат и на радикализацијата и на насилства и на тероризам, изјави Чавков.

На подрачјето на Куманово минатиот месец, во споредба со истиот период лани евидентирано е намалување на кривичните дела кои се гонат по службена должност од 36,3%, односно регистрирани се 58 кривични дела наспроти 91 кривично дело. Министерот Чавков соопшти дека регистрирано е и намалување на прекршоците во јавниот ред и мир.

Полицијата во Куманово, посочи Чавков, ќе биде достапна за граѓаните и будно ќе ги следи состојбите. Во меѓувреме овој податок како и фактот дека постепено расте довербата на граѓаните во полицијата, го истакна и началникот на СВР Куманово, Моме Јакимовски.

Претседателот на месната заедница Тоде Мендол, Шабан Демири изјави дека на 9 и 10 мај граѓаните го положија испитот и покажаа дека не потпаѓаат под влијанија.

Оваа е втора посета на Куманово на министерот за внатрешни работи Чавков од неговото назначување на оваа функција.