Ги оставил мигрантите среде пат и избегал - македонската полиција го бара

Полицијата работи на откривање на возачот кој вчера во камион оставил 33 мигранти на стариот пат Скопје - Куманово и побегнал.

Како што инфомира МВР, вчера околу 11:30 часот на патот Никуштак-Орланци било пронајдено товарно моторно возило „Мерцедес“ со лажни велешки регистарски ознаки.

- Од страна на полициски службеници од Регионален центар-Север и екипа од крим-техника при СВР-Куманово извршен е увид на местото на настанот, при што било утврдено дека во возилото се превезувале 33 мигранти од кои 15 од Иран, 16 од Ирак и две од Либија. Исто така, било констатирано дека се работи за товарно моторно возило „Мерцедес“ со регистарски ознаки кои се одјавени на 04.01.2016 година во Штип. Повикан бил и претходниот сопственик, 33 годишно лице од Штип, кој изјавил дека 04.01.2016 година камионот го продал на Џ.И.(24) од велешко, за што на увид приложил купопродажен договор, соопшти МВР.

Оттаму прецизираат дека тројца од мигрантите ќе бидат сместени во Прифатниот центар за странци во Скопје, на 16 мигранти од Ирак им била издадена Потврда за изкажана намера за поднесување на барање за азил и ќе бидат спроведени во Кампот на Табановце, а за 15 мигранти од Иран поднесен е Записник за прием на усно барање за признавање право на Азил, по што  ќе се спроведат во Центарот за Азил Визбегово-Скопје.

За сите преземени мерки бил известен дежурен јавен обвинител при ОКК-Скопје.

Се преземаат мерки за расчистување и документирање на настанот и пронаоѓање на сторителот.