Опасност од зарази во поплавените делови - топлото време дополнителен проблем

Цревни и кожни заразни заболувања се регистрирани кај десетина жители во Стајковци. Најголем број од нив се деца. Заболени биле пријавени и во Смилковци, објави порталот „Здравство24“.

-Имаме веќе четири деца кои ги хоспитализиравме на инфективна. Има и со кожени заболувања и тоа што вчера викаа дека е алергија не е, тоа се бактериски инфекции, вели др. Ангела Мими Христов од Клиниката за Детски болести.

На влезот во Стајковци е и пунктот на Брза Помош. Постојано имаат жители од селото кои бараат здравствена помош. Во болница вчера беа однесени четворица.

Топлото време е дополнителен проблем за ширење на заразните болести. Епидемиолозите апелираат на одржување на личната хигиена. Засега добра околност за погодените жители е што водата за пиење е безбедна.

Од Министерството за здравство ќе побараат од Град Скопје дезинсекција на целиот регион.