Подобро да се гради отколку да се плаќаат кирии - еве што велат од Владата за градењето кај „Бристол“
За изградба на објектот на Советот за радиодифузија на парцелата кај хотелот „Бристол“ запазени се сите процедури согласно постојните закони. Овој случај не треба да се користи за политичка промоција, бидејќи со негова изградба државата ќе заштеди пари кои досега се одлевале за кирии, а ќе се овозможи и работа на градежниот сектор, изјави портпаролот на Владата, Александар Ѓоргиев.
- Сите дејствија, сите процеси, сите процедури во врска со уредувањето на градежното земјиште и припремата за градба во централното градско подрачје се и ќе се извршуваат согласно законите. Тоа е законско право, но истовремено и законска обврска за секоја институција независно дали е локална или централна. Овој државен инвеститор, Советот за радиодифузија, кој што треба да гради објект на дадената локација ги има добиено сите потребни документи од страна на единиците на локалната власт за да отпочнат со градба. Ги има платено сите комунали врз основа на коишто единиците на локална самоуправа имаат обврска да му го подготват целокупното земјиште за тој да може да почне со градба. Овој државен орган, СРД досега во 10-годишниот период на име на кирии коишто оделе во приватни џебови има исплатено околу 3 милиони евра. Сега со градбата на овој објект тоа веќе нема да се случува, нема да имаме одлевање на државни пари во приватни џебови, тие ќе имаат свој објект, а дополонително пак средствата коишто ќе бидат употребени за изградба на овој објект ќе одат во градежните компании и ќе обезбедат вработеност на градежните работници, го презентира владиниот став на новинарско прашање Ѓорѓиев на денешната прес-конференција во Владата.
Како што посочи Ѓорѓиев, обврска на секоја институција на централната и на локалната власт е да ја гарантира правната и економската сигурност на секој субјект, на секој инвеститор независно дали е државен како во овој случај или пак приватен инвеститор кој што ги добил сите одобренија за градба, кој што ги уплатил сите комунали, кој што планирал деловен потфат и кој што го реализира. Тој подвлече дека Владата до сега покажала низ своите политики и активности дека се грижи за животната средина и пошумувањето.
- Тоа е вистинското прашање во овој или други вакви случаи, кириите, а не отстранувањето на дрвјата затоа што во досегашниот период оваа Влада докажала дека се грижи за пошумување на Република Македонија како никоја друга влада досега во изминатиот период. Има посадено околу 40 милиони садници, а дополнително во текот на октомври и на ноември ќе бидат посадени уште 5 милиони садници од коишто најголем дел, согласно планот на Владата, е да бидат посадени во рамки на единиците на локална самоуправа, вклучувајќи ја и општината Центар. Тоа е вистинското прашање - кириите, и одговорот е дека не треба да правиме дефокус, не треба да ги дезавоираме или пак политизираме овие настани да се искористуваат во функција на политичка промоција. Вистинското прашање е дали сите ние како општество треба да продолжиме да замижуваме и да дозволуваме државни средства да одат за кирии во приватни џебови или пак да се гради, да се обезбедуваат објекти за нашите институции, да се обезбедува вработеност за работниците и да се одржува економскиот раст и развојот и на градежниот сектор и на туристичкиот сектор и воопшто државниот развој на Република Македонија, рече портпаролот Ѓорѓиев.
