Пломп порачува: Да не се губи време и да се формира влада

Холандскиот амбасадор во Македонија Ваутер Пломп денеска го повтори ставот на еврокемсарот Јоханес Хан дека нема време за губење во однос на формирањето нова влада во земјата и потенцира дека тоа сега е во рацете на сите политички партии и оти зависи од нив. Новата влада, според него, треба да биде реформска и да се фокусира на одговорноста и отчетноста.

- Во однос на последните случувања и преговорите за формирање нова Влада, можам само да го повторам ставот на еврокомесарот Јоханес Хан, а тоа дека е нема време за губење. Во исто време можам да кажам дека тоа зависи само од партиите и оти е во рацете на политичарите, рече холандскиот амбасадор кој присуствуваше на презентацијата на Истражувањето насловено „Неосновано притворени-правни и буџетски импликации“ во ЕУ Инфо центарот во Скопје. 

Холандија, додаде тој, се надевам дека Македонија ќе има влада којашто целосно ќе биде фокусирана на реформите.

- И не само реформи, секако, една од битните работи на која што новата влада ќе треба да се фокусира е одговорноста и отчетноста. Кога зборуваме за отчетност тоа значи поддршка на работата на Специјалното јавно обвинителство, како и поддршка од сите актери, како судовите, за да може СЈО да ја заврши својата работа независно, рече Пломп.  

Холандија, потсети тој е долгорочен поддржувач на Владата на Република Македонија во процесот на сите реформи потребни за зачленување на земјата во ЕУ.