Акција на македонската полиција - запленети 30 килограми марихуана
Триесет килограми марихуана се пронајдени вчера при полициски претрес во домовите на две лица во селото Аранѓел, во Кичевско.
Припадници на кичевската полиција, криминалистичката полиција од Охрид и од Единицата за недозволена трговија со дрога по претходно добиени оперативни сознанија извршиле претрес во домовите на лицата 45-годишниот А.А. и 47-годишниот Е.А..
Во приземните простории на куќата сопственост на А.А. биле пронајдени три најлонски кеси во кои имало три големи пакувања - црни најлонски вреќи завиткани со селотејп трака, додека во спалната соба во куќата на Е.А. била пронајдена една црна најлонска кеса полна со зелена растителна материја.
Пронајдените предмети биле одземени и предадени на вештачење во МВР во Скопје, а двете лица се приведени.
По целосно документирање на случајот, против двете лица ќе биде поднесена кривична пријава поради постоење основано сомнение за сторено кривично дело „неовластено производство и пуштање во промет на наркотични дроги, психотропни супстанци и прекурсори“.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
