СДСМ: Владата оствари тесно-партиски интереси зад параванот на социјални вработувања во Македонски шуми

Господине премиер Груевски и министре Ставрески,

 Во Македонски шуми, зад параванот на социјални вработувања, остваривте, ама тесно-партиски интереси. Тажно и срамно! Поигрувајќи се со надежта на најранливата категорија граѓани. Социјалните случаи!  

 Ако биле манипулација тврдењата дека сте вработиле луѓе исклучиво блиски до ВМРО-ДПМНЕ, СДСМ бара јавни одговори од вас:

 Како меѓу вработените од Гостивар, во групата, внимавајте, на самохрани родители, е вработен член на ВМРО-ДПМНЕ, кој има сопруга? Сопственичка на фризерски салон. А и тој самиот има приватна фирма?

 Како, според нашите податоци од теренот, од Свети Николе се вработени 21-но лице, сите до еден поддржувачи на ВМРО-ДПМНЕ?

 Како од Карбинци е вработено лице кое веќе работи во конфекција, кој има сопруга, која исто така зема плата од работа во конфекција? Со нив живее и мајка му која прима пензија, а поседуваат и сопствен автомобил? Или, од истата општина, е вработен човек кој живее со мајка пензионерка, работат ниви, имаат стан во Штип и автомобил? И сите се членови на ВМРО-ДПМНЕ?!

 Како од двете вработувања во Вевчани и двете се членки на Унијата на жени на ВМРО-ДПМНЕ? Едната и претходно вработувана со договори за дело во јавни претпријатија за партиски заслуги?

 Како од 44-рицатата примени од Охрид, во Македонски шуми, 9-мина воопшто не постојат? Исто како што меѓу 30-темина примени од Струмица, дури 12 НЕ ПОСТОЈАТ? Воопшто не постојат нивните имиња!

 Веќе соопштивме за партиски вработувања во Струмица, Кичево, Делчево и Гевгелија. Имаме уште податоци за вакви примери и во други делови од земјата.

 Вака ли остварувате премиере Груевски и министре Ставрески?

 Со поигрување со социјалата, на која што целата надеж и беше во телевизорите и вашето ЛОТО ШОУ? Од кое извлековте мнозинство среќници, ама најмалку социјалци?

 Бројката од пријавените 23 илјади граѓани за вработувањата во Македонски шуми покажува дека власта на ВМРО-ДПМНЕ продуцира сиромаштија, која е и предмет на манипулации на истата оваа власт.

 Почитувани,

 СДСМ ја повика Владата да ги објави рангирањата на сите 23 илјади пријавени кандидати, вклучувајќи ги и 1600-те вработени, но тоа до овој момент не се случи.

 Aко не се достапни базите на податоци, како ќе се знае дека навистина се вработени 1600-тини лица?

 Бараме одговор од Груевски и Ставрески. Што криете? Дополнителни манипулации со најранливата категорија граѓани?

 Со необјавувањето на ранг листата, на луѓето кои не добиле работа, а се вистински социјални случаи, одземено им е правото на приговор. Врз основа на која споредба на податоци тие ќе ја основаат својата жалба? Или тоа е вашата цел?

 СДСМ бара Владата веднаш да престане со потценувањата и поигрувањата со сопствениот народ.

 Ако е се чисто во Конкурсот за Македонски шуми, нема од што да стравуваат.

 Како што тврдат дека јавно во телевизиското ЛОТО ШОУ доделиле 1600-тини вработувања, така јавно треба да ги објават бодувањата и ранг листата.

 Господа, тоа е ваша должност!

Интегрален текст од прес-конференција на СДСМ.

 

 

 

13.10.2013 - 14:34

најчитано сега