Бобан Бабунски повеќе не е селектор на младата репрезентација

Управниот одбор на Фудбалската федерација на Македонија денеска на својата редовна седница донесе одлука Бобан Бабунски да се разреши од должноста селектор на репрезентацијата на Македонија до 21 година и да му се раскине договорот.
 
- Одлуката за раскин на договорот со досегашниот предводник на младата репрезентација е донесена врз основа на постигнатите резултати во тековниот квалификациски циклус за пласман на ЕП 2015 година кои не соодветствуваат со предвидувањата, амбициите и квалитетот на селекцијата до 21 година, стои во образложението од ФФМ за разрешувањето на Бабунски.
 
Од ФФМ додаваат дека со ваквиот потег очекуваат свежина во играта на младите репрезентативци и постигнување подобри резултати.
 
- Бобан Бабунски, функцијата селектор на репрезентацијата до 21 година ја извршуваше од 1 јуни 2009 година и секогаш ја имаше максималната поддршка од ФФМ. Желбата за промена и давање шанса друг кандидат да ја води селекцијата, кој со својата мотивираност, страст и голема желба ќе придонесе кон подобри резултати, се основните причини поради што членовите на УО на ФФМ едногласно ја донесоа одлуката за раскин на договорот.
 
Управниот одбор на ФФМ формираше петчлена комисија во состав Илчо Ѓорѓиоски, Муамед Сејдини, Светозар Станковски, Лазар Ракиџиев и Марјан Стојкоски кои во консултација и разговори со тренерската комисија во ФФМ ќе даде предлог за нов предводник на националниот тим до 21 година. Членовите на Управниот одбор се согласија дека тоа треба да биде некој кој добро ги познава состојбите во македонскот фудбал, ги следи сите наши таленти надвор од границите на Македонија и човек кој покрај фудбалско знаење, ќе биде и голем мотиватор, педагог и силна психолошка поддршка за младите фудбалери, нешто што секако им е потребно во процесот на градење професионална кариера.
 
Новиот селектор ќе го предводи тимот и на двата последни натпревари од квалификациите за пласман на ЕП 2015 година.