СДСМ: Јавноста од ВМРО-ДПМНЕ виде само лажна загриженост, деструктивност и обиди за поткопување на здравствениот систем

ВМРО-ДПМНЕ нема чувство за државни и национални интереси и секогаш, дури и во пандемија се однесува деструктивно и неодговорно и ги става партиските интереси пред интересите на граѓаните, соопштуваат од владејачката СДСМ.

Според партијата, од почетокот на најголемата пандемија, со која се соочува целиот свет, од опозициската ВМРО-ДПМНЕ јавноста видела само лажна загриженост, деструктивност, поткопување на здравствениот систем, обиди за ширење страв и паника кај граѓаните.

-ВМРО-ДПМНЕ ширеше невистини дека нема доволно тестови и заштитна опрема за вирусот, кој според нив, некогаш беше смешен, а некогаш опасен. Додека Мицкоски кршеше мерки, одеше кришум по кафеани и теретани, додека ВМРО-ДПМНЕ организираше јавни собири, здравствените работници деноноќно се бореа против коронавирусот. Колку ВМРО-ДПМНЕ се грижат за здравјето на граѓаните покажаа со кочење на заемот за опремување на болниците, со оцрнување на здравствениот систем, а од друга страна ги поттикнуваа граѓаните да не ги почитуваат мерките, се вели во дописот од СДСМ.

Според партијата, ВМРО-ДПМНЕ со морбидни перформанси си поигрувала и се потсмевала со судбините на починатите и заболените.

-Грижата за здравјето на граѓаните не се покажува со зборови, туку со дела, а режимот на ВМРО-ДПМНЕ со негрижата и коруптивното 11-годишно владеење предизвика хаос во здравствениот систем и принуди реномирани странски фармацевтски компании да се повлечат од државата. Во периодот меѓу 2012 и 2015, во годините на најголем режим, компании како пандемијата, Глаксо , АстраЗенека и дел од Новартис се повлекоа од нашата држава, заради паралелниот увоз на лекови и вакцините со сомнително потекло. Таквиот однос го наруши угледот на државата и здравствениот систем, нешто што СДСМ и институциите што ги предводи, со сите сили се обидуваат да го поправат, да ја вратат довербата во македонското здравство. Но, и покрај глобалните предизвици за набавка на вакцини, вакцините се обезбедени, имунизацијата започнува наскоро, како последен чекор во борбата против коронавирусот, колку и тоа да не му се допаѓа на Мицкоски, се вели во дописот.