Тасевска: Силјановска да им се извини на пенизонерите за навредите

СДСМ неколкупати ги покачи пензиите и во споредба со времето на ДПМНЕ просечната пензија е покачена во просек за 6.400 денари, изјави на денешната прес-конференција Лидија Тасевска, пратеничка на СДСМ.

Овој месец следува и ново зголемување на пензиите од 5,3% согласно новата методологија којашто ја донесовме заедно со пензионерите, истакна Тасевска.

„Дополнително, во новиот пакет антикризни мерки обезбедивме месечна поддршка и до 15.000 денари во период од 5 месеци за пензионерите со пониски пензии.

СДСМ ги почитува и се грижи за нашите повозрсани граѓани. Додека СДСМ ги покачува пензиите кандидатката на ДПМНЕ, Гордана Силјановска слушаме како ги навредува пензионерите, споредувајќи ги со Мапет шоу. Крајно несоодветно, непримерно и неодговорно“, нагласи Тасевска.

Тасевска потенцираше дека пензионерите не заслужуваат да бидат омаловажувани ниту навредувани.

„Затоа Силјановска треба да излезе и да им се извини на пензионерите за навредите. Односот на Силјановска кон пензионерите е потврда дека нема никаква промена во ДПМНЕ. На граѓаните не им треба претседател кој ќе биде продолжена рака на Белата палата, партиски послушник, не им треба реприза на Иванов. На граѓаните не им треба уште една катастрофа по примерот на Скопје. Ниту ДПМНЕ ниту Силјановска не можат да донесат промени на подобро. Тие едноставно сакаат да се вратиме во минатото, да ја закопаме иднината и да ја уништиме надежта за подобро утре! Затоа граѓаните на изборите ќе изберат европска иднина со СДСМ и Стево Пендаровски“, рече Тасевска.