(ВИДЕО) Бојмацалиев: Прв меѓународен лет на Медикоптерот на МВР

Дополнителниот заменик министер за внатрешни работи, Митко Бојмацалиев заедно со директорот на бирото за јавна безбедност ,Сашо Тасевски и директорот на Градска општа болница „8 Сепетември, д-р. Христијан Костов, утрово присуствуваа на првиот меѓународен лет со хеликоптер од Одделот за воздухопловни единици при МВР со кој за медицински цели беше транспортирано лице - пациент од Скопје до Виена, Австрија.

„Оваа наша хумана мисија  не само што ја демонстрира кооперативноста на двете Министерства за внатрешни работи и Министерството за здравство кон подобрување на услугите за граѓаните, туку и го потенцира значењето на интеграцијата на модерните технологии и ресурси во спасувачките и медицинските операции”, истакна Бојамацалиев.

Тој додадете дека употребата на Медикоптерот претставува значаен напредок во националната способност да се пружи итна медицинска помош на тешко достапни места, но и на пациенти на кои им е потребен итен транспорт до други здравствени установи.

Од страна на директорот на ГОБ „8ми Септември", д-р Христијан Костов беше истакнато дека во најкраток временски период се докажа подготвеноста и кооперативноста на МВР и МЗ, со цел подобрување на услугите за граѓаните преку обезбедување на медицинска помош на пациенти на кои им е потребен итен транспорт до други здравствени установи.

„После интензивни договори, болницата набави и вгради најсовремена медицинска опрема за интензивна нега на пациенти во медикоптерот за итен медицински транспорт. Заедно со Министерството за внатрешни работи ја утврдивме медицинската и безбедносната маршута на движење на медикоптерот, со цел безбедно пристигнување на нашиот пациент во придружба на искусен медицински тим за интензивно лекување до Клиниката во Виена. Пред се' како здравствено лице и како директор на ГОБ 8ми Септември, упатувам честитки до сите тимови вклучени во проектот за темелната подготовка и соработката помеѓу МВР и медицинскиот персонал од нашата болница, со што уште еднаш потврдуваме и ги засилуваме нашите капацитети како држава за брза реакција во итни медицински случаи", истакна директорот Костов.