Голема заинтересираност кај велешани за вакцинација

Од почнувањето на вакцинацијата во Велес, вкупно се аплицирани околу 28 000 дози од сите типови на вакцини, од кои со прва доза се вакцинирани околу 16 250 граѓани, а со втора доза 11 750 граѓани, покажуваат податоците од Здравствениот дом во тој град.

Зголемен е интересот на граѓаните за примање на вакцина и дневниот просек на вакцинирани граѓани е 550 до 700 граѓани. Инаку денеска до 9 часот Здравствениот  дом се вакцинирани 120 граѓани. На 9 јули и на 5 август, вакцинирани се вкупно 52 малолетни лица, а по 5 август, сите деца кои доаѓаат во придружба на родител / старател се прифаќаат и се вакцинираат.

На 17, 18 и 19 август и на 30 и 31 август во вакциналниот пункт во ССОУ „Коле Неделковски” ќе се спроведува само ревакцинацијата на граѓаните со вакцината на „Астра Зенека“. Сите останати активности поврзани со вакциналниот пункт во Велес се одвиваат непречено и секојдневно во просториите на Здравствениот дом.

Жителите на Општина Велес, како што апелираат надлежните, треба да ги следат препораките и да се придржуваат кон мерките за заштита од пренесување на Ковид-19.