Граѓаните да не стравуваат: Властите уверуваат дека има сосем доволно вакцини против сезонскиот грип

Вакцини за сезонски грип има доволно за сите, уверуваат здравствените власти во земјава. Обезбедени се 40.000 дози на вакцини против сезонскиот грип за ранливите категории на граѓани кои имаат потреба од нив, и истите се бесплатни. Но, многу прашања пристигнаа до нашата редакција во врска со тоа, дали овие се единствените вакцини со кои располага држава наменети за сезонски грип, бидејќи интересот кај ранливите категории е огромен. На страницата vakcinacija.mk се пријавија околу 36.000 граѓани.

Но, министерот за здравство Венко Филипче ги реши сите дилеми, соопштувајќи ја денешната информација. Министерот потенцираше дека има бесплатни 40 000 и плус 11 000 комерцијални вакцини против сезонскиот грип.

– Засега тука сме во рамките на она што е вообичаена проценка за тоа колку граѓани се заинтересирани за вакцинација против сезонски грип, додаде Филипче, одговарајќи на новинарски прашања по изјавата за мерките кои денеска на состанок ги донесе Комисијата за заразни болести.

Во претходни наврати министерот потенцираше дека вакцинацијата за сезонски грип и против Ковид-19 може да биде истовремена, но ова не е праксата која се имплементира во пунктовите во Центрите за јавно здравје каде што се одвива вакцинацијата. Нашите извори велат дека, докторите имаат насоки да им соопштуваат на пациентите дека после примена вакцина против сезонскиот грип, треба да чекаат две недели за примање на вакцина против коронавирусот. Оваа пракса во пунктовите, за нашата редакција ја потврдија, повеќе лица од различни делови на државата.