Историчарите се оградуваат од Заев: Терминот „окупација“ е општоприфатен за улогата на Бугарија во Втората светска војна

Историчарите се оградуваат од премиерот Зоран Заев по неговото интервју за БГНЕС.

Членот на македонскиот дел од историската комисија Огнен Вангелов апелираше политичарите да се воздржат од тврдења и коментари за кои не се запознаени.

-Како член на македонскиот дел од Комисијата, лично се оградувам и ги осудувам последните изјави на Премиерот и апелирам политичарите да се воздржуваат од тврдења и коментари со кои не се запознаени и не се од нивниот домен на познавања и експертиза. Во цела западна историографија и во доменот на јавна историја терминот окупација е општоприфатен и за улогата на Бугарија во Втората Светска Војна доволно говори мировниот договор потпишан со сојузниците вклучително и со Македонија како дел од Југославија во 1947, напиша Вангелов на Фејсбук.

И историчарката Љубица Спасковска која е научен соработник на Универзитетот во Ексетер, Велика Британија во историската комисија побара од политичарите да се воздржат од коментари за теми кои што не ги разбираат.