Мајката на убиениот Пино: Не може да одземеш нечиј живот и да поминеш вака

Мајката на убиениот Пино Секондо и нејзиниот сопруг, кој има срцеви проблеми, биле шокирани од одлуката на судот да се укине 19-годишната казна за Ангела Ѓоргиевска, осудена за убиството на нивниот син, пренесува „Фокус“.

Пресудата била укината поради суштествени повреди во постапката, а случајот вратен на повторно судење.

-Очекувавме, ако веќе зборуваме за правда, доживотен затвор. Не може да одземеш нечиј живот, да си го дозволиш тоа право, и да поминеш вака… Ова е само еден лош пример, еден вид на поттик на потенцијалните убијци, на криминалците… Зошто нема доживотна казна за вакво дело? Зошто не се менуваат законите во Македонија, зошто ова не се искористи како пример за другите, за во иднина некој добро да размисли пред да крене рака, пред да одземе нечиј живот?, изјави очајната мајка за „Фокус“.

Случајот со убиството на Пино (26) долго ја брануваше јавноста. Тој исчезна од семејниот дом во Скопје во декември 2018 година, и по него се трагаше со месеци.

Неговото тело беше случајно пронајдено на 29-ти април 2019 година, од минувач на местото викано Башинец во атарот на село Љуботен.