„Мавровски меморијал“: Романците покажаа дека се без конкуренција
Романските натпреварувачи ја потврдија својата доминација на меѓународната манифестација во нордиско скијање „Мавровски меморијал’’, откако и на денешните трки тие беа најдобри.
Со трките на 5 километри во машка и женска конкуренција одржани денеска на патеката „Мирна долина’’ на Бистра, заокружена беше дводневната програма од 52-то издание на „Мавровскиот меморијал’’.
Како и вчера, најдобри повторно беа романските натпреварувачи. Во машката трка, првото место го освои Паул Пепене со време од 11:33.62 минути. Втор беше неговиот сонародник Петрика Хоџи - 11:51.12, а трет Еди Дадиќ од Хрватска - 12:04.15.
Најдобро пласиран македонски натпреварувач беше Дарко Дамјановски, кој го освои 9-место со време од 13:21.20, додека Тони Станоески беше 10-ти со резултат 13:52.94.
Кај жените Тимеа Сара од Романија до првото место стигна со време од 13:57.82 минути, пред Антонија Григориева (14:26.28) и трето пласираната Тања Красиќ од БиХ (14:45.17).
Македонската нордијка Росана Кироска го освои 5-место со време 15:38.90.
На 52-то издание на „Мавровскиот меморијал’’ настапија 52 натпреварувачи во двете конкуренции од осум држави.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
