Mакедонски тренери на професионален ангажман во Индија
Во просториите на Агенцијата за млади и спорт, денес беше потпишано писмо за соработка помеѓу директорот на Агенцијата за млади и спорт, Марјан Спасески и Главниот извршен директор на Глобалната приватна компанија KOOH Sports, Чираг Пател, која е една од водечките компании со седиште во Индија, која обезбедува програми за тренинг по меѓународни стандарди, претставувајќи го спортот како животен стил и можност за развој на професионална кариера.
Договорената соработка е во насока на овозможување услови македонски тренери од неколку спортови, како фудбал, кошарка, тенис и технички експерти за физичко образование да бидат професионално ангажирани за одржување настава и вон наставни спортски активности во индиски приватни образовни установи. Македонските тренери кои ќе изразат желба за ваков професионален ангажман, кој би траел од неколку месеци до неколку години, потребно е да го зборуваат англискиот јазик и да имаат соодветно искуство во спортската област.
Истовремено, Пател се сретна и со првите луѓе на Фудбалската, Кошаркарската и Тениската федерација, со кои се разговараше за можноста за реализација на Програма за организирање на заеднички спортски камп за деца во двете земји, Македонија и Индија.
Иницијативата за почеток на оваа соработка е директен резултат од последното “Роуд шоу” на Премиерот и владиниот економски тим во Индија.
Со почетокот на оваа соработка, Агенцијата за млади и спорт и Република Македонија ќе станат дел од реномираниот круг на партнери со кои оваа компанија успешно соработува - национални и меѓународни спортски федерации, академски институции и глобални спортски брендови како Reebok.
KOOH Sports во моментов ангажира преку 250 тренери и други стручни лица од областа на спортот, кои работат во повеќе од 100 образовни установи и преку 30 градови, давајќи успешна едукација на околу 100.000 млади лица на возраст од 2-18 години.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа