Ученици од Македонија, Хрватска и Литванија ќе учат да бидат одговорни претприемачи
Ученици од Македонија, Хрватска и Литванија ќе учат промовирање на корпоративна општествена одговорност и филантропија во рамки на проектот „Ученици денес-одговорни претприемачи утре“, финансиран од Националната агенција за европски образовни програми и мобилност преку програмата ,,Еразмус +“.
Носител на проектот е македонското Здружение за социјални иновации „АРНО“ во партнерство со СУГС „Раде Јовчевски – Корчагин“ од Скопје, гимназија „Лиздеикос“ од Литванија, „Прва сушачка гимназија“ од Хрватска и организацијата „Аут оф д Бокс” од Белгија.
Проектот, како што се наведува во соопштението на АРНО, има за цел да ги надгради постоечките програми за претприемништво во училиштата, промовирајќи ги концептите на филантропија и корпоративна општествена одговорност и учејќи ги младите за новите бизнис модели на социјални претпријатија.
Според Ирина Јанеска од „АРНО“, бизнис-секторот е алката што е важна, бидејќи опфаќа широк спектар на активности, од филантропија до нови бизнис модели како социјални претпријатија.
- Преку проектот ние ги охрабруваме младите да станат бизнис лидери, кои утре кога ќе станат моќни и влијателни не треба да заборават да возвратат и да помогнат на оние на кои им треба помош. Заедно со професорите и учениците ќе учиме за стратешки донации, за социјално претприемништво и за одржлив развој. Сите имаме многу за учење и многу за правење. Овој проект веруваме ќе биде корисен за сите, изјави Јанеска.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа