Градски парк во Скопје збогатен со 70 нови дрва

Компании и организации учесници на првиот „Форум на добри компании“ денеска во Градскиот парк во Скопје засадија вкупно 70 зимзелени дрвца.

Пикникот на добри компании е во организација на  Асоцијацијата за истражување, комуникации и развој „Паблик“,  Амбасадата на Кралството Холандија во Скопје и „Скопје Мериот Хотел“. 

Амбасадорот на Кралството Холандија Ваутер Пломп рече дека дрвјата се иднината на градот и дека денешниот настан е одличен пример за корпоративно-општествената одговорност.

- Никој не може да работи сам. Соработката меѓу бизнис секторот и граѓанските организации е одличен модел за постигнување позитивни промени во општеството, изјави Пломп.

Директорката на „Паблик“ Климентина Илијевски рече дека со денешната иницијатива зад себе оставаат позитивни отпечатоци во природата.

Дрвјата ги обезбеди „Скопје Мериот хотел“ заедно со холандската компанија „Еуропеан плантс“ од Тетово, а парцелата за садење Град Скопје.

Генералниот менаџер на „Скопје Мериот Хотел“ Дирк Влирбум рече дека инвестирањето во заедницата е основата на нивната стратегија за корпоративна-општествена одговорност и затоа одлучиле да се „раззелени“ настанот преку садење дрвја.

- Верувам дека ова ќе стане добра традиција бидејќи заедно сме подобри и можеме да направиме уште поголема разлика во заедницата во текот на целата година, изјави Влирбум.

Следниот Форум на добри компании е закажан за 2 ноември 2017 година.