Пријавувањето до утре: Над 40 верници ќе скокаат по крстот во Скопје
Повеќе од 40 луѓе досега се пријавиле да учествуваат во традиционалното фаќање на крстот в петок на Богојавление – Водици во Вардар во центарот на Скопје.
Пријавувањето почна на 10-ти и ќе трае до утре, 17 јануари. Од Скопската епархија, која трета година го организира пријавувањето на фаќачи на светиот крст, велат дека досега се пријавиле 44 кандидати, меѓу кои има и женски.
Најголем одѕив има во последните денови, така што очекуваат денеска и до утре попладне, кога завршува пријавувањето, бројот на заинтересирани учесници да биде уште поголем.
Кандидатите може да се пријават во Скопската епархија до Соборниот храм „Св. Климент Охридски“ и треба да поминат лекарски преглед во Спортска медицина.
Спуштањето на крстот во водите на Вардар на 19 јануари ќе почне во 12 часот од мостот кај хотелот „Холидеј ин“ и ќе го изврши поглаварот на Македонската православна црква г.г. Стефан.
Претходно, во 9 часот, архиепископот г.г. Стефан ќе богослужи Златоустова литургија во црквата „Рождество на Пресвета Богородица“, а потоа богојавленски литии ќе се упатат кон местото каде што ќе се одржи традиционалната верска манифестација.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа