Заев: Испратени се тимови за спасување и механизација во Албанија, стоиме на располагање
Целосно сме подготвени да и понудиме помош на Албанија по земјотресот што се случи рано утринава. Веќе се испратени тимови за спасување, а дадена е насока до најблиските региони како Охридско-струшкиот и Кичевскиот да испратат механизација. Подготвени се и лекарските тимови и противпожарните служби доколку има потреба, да бидат испратени, изјави денеска премиерот Зоран Заев.
Одговарајќи на новинарски прашања, Заев рече дека уште рано сабајле се донесени сите одлуки да и се асистира на пријателска Албанија поради трагедијата што се случи.
– Стоиме целосно на располагање. Владата денеска на седница ќе расправа токму за тоа. Се нудиме целосно да помогнеме, се што е возможно да се спаси човечки живот, да се врати животот во нормала. Жалам за оваа непогода, ја почувствувавме и ние овде во Скопје, ја почувствуваа и на другата страна на Јадранското Море, во Италија, но за жал епицентарот во близината со 6,3 степени направил големи штети, меѓу кои и загубата на човечки животи, рече Заев, изразувајќи сочувство за жртвите во земјотресот во Албанија.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа