Триесет дена притвор за осомничениот Скопјанец за убиството на зетот и за обид за убиство на внукот

На осомничениот Скопјанец , кој го уби својот зет и го рани со пиштол внукот од сестра си во неговата продавница во Тафталиџе, судот му одреди 30 дневен притвор по барање на Обвнителството.

Обвинителството го товари лицето за  Убиство од чл.123 ст.1, Убиство од чл.123  ст.1 во врска со чл. 19 (обид), како и Недозволено изработување, држење, посредување и тргување со оружје или распрскувачки материи од чл.396 ст.1 од Кривичниот законик.

На 20 декември, на улица „Московска" во Скопје, осомничениот неовластено држел огнено оружје – пиштол марка „Чешка Зброевка" модел VZOR 50 cal калибар 7.65. Со оружјето со умисла лишил од живот едно лице, а уште едно се обидел да лиши од живот. Кога оштетените татко и син дошле пред дуќанот на осомничениот и почнале да тропаат на вратата, упатувајќи му закани да отклучи и да излезе надвор за да ги решат меѓусебните недоразбирања, тој без да отклучи го извадил пиштолот кој го држел без дозвола и го насочил кон нив. Во тој момент тие се оддалечиле, па осомничениот ја отклучил вратата, мислејќи дека си заминале. Тогаш ги забележал како повторно се приближуваат, па пак влегол во дуќанот и го зел пиштолот и започнал да пука кон нив. Еден од оштетените починал на лице место, додека другиот се здобил со тешки телесни повреди – огнострелни рани во пределот на десниот колк и абдоменот.

Надлежниот јавен обвинител процени дека во конкретниот случај се исполнети законските основи, па до судијата на претходна постапка од Основниот кривичен суд Скопје достави предлог за определување мерка притвор за осомниченото лице. Кривичниот суд на Скопјанецот му определи мерка 30 дневен притвор.