ЕСМ: Мерки за заштита на вработените, производството согласно потребите

 АД Електрани на Македонија (ЕСМ) информира дека се преземени сите мерки за заштита од коронавирусот со цел да се обезбеди здравјето на вработените. Посебни мерки се преземени во РЕК Битола каде се произведуваат 70 проценти од електричната енергија и кој е од клучно значење за електроенергетскиот сектор.

– Од изутрината на главната капија се поставени средства за дезинфекција на рацете, а во соработка со Синдикатот на АД ЕСМ и Синдикатот на РЕК Битола, секој од вработените доби заштитна маска и ракавици. Средства за лична хигиена на база на алкохол се поставени во сите работни простории каде викендов, пак, започна вонредна дезинфекција. Се дезинфицираат и автобусите, патничките автомобили, амбулантните возила. На сите огласни табли поставени се информативни летоци за превенција од ширење на корона вирусот. Во РЕК Битола од денес забранет е влезот за сите надворешни лица кои немаат ургентна потреба, се наведува во соопштението.

Од АД ЕСМ информираат дека производството на електрична енергија од капацитетите на РЕК Битола и на АД ЕСМ се одвива во согласност со потребите на електроенергетскиот систем.

Од работни обврски во Комбинатот се ослободени 100-тина вработени заради грижа на деца до 10 години, а се прави и дополнителна внатрешна реорганизација за да се обезбедат услови за работа од дома.