СДСМ: Со мобилизација на сите капацитети, Владата спречи драстичен раст на цената на струјата

Со брза и навремена реакција, Владата предводена од СДСМ успешно спречи ценовен шок за граѓаните и драстично зголемување на цената на струјата, нагласуваат во писменото соопштение од страна на владејачката партија.

Мобилизирањето на сите домашни капацитети за производство на електрична енергија придонесе, велат од СДСМ, цената на струја да се зголеми за 9,48% што е далеку помалку од првичните проекции.

Притоа, објаснуваат оттаму, евтината тарифа на струјата како и евтината тарифа во недела ќе се задржат, а дополнителни рестрикции нема да има.

Економијата е стабилна и ликвидна, додаваат од оваа партија, државата, како што велат, е подготвена да им помогне на граѓаните и компаниите во надминување на овој предизвик.

„За граѓаните од ранливите категории обезбедени се 60 милиони денари со Програмата за заштита на потрошувачите на електрична енергија. Околу 7.500 домаќинства со ниски примања во времетраење од 12 месеци ќе добијат намалување на месечната сметка за потрошена електрична енергија во износ од 600 или 800 денари месечно, во зависност од големината на домаќинството. За разлика од Владата предводена од СДСМ која посветено работи на креирање мерки со кои ќе се намалат последиците од енергетската криза, ВМРО-ДПМНЕ на чело со Христијан Мицкоски одмага со лаги и дезинформации во врска со кризата за да создаде паника кај граѓаните“, стои во писмениот допис од партијата на власт.

Мицкоски, велат тие, лажеше дека цената на струјата ќе биде зголемена до 40%, за да ја искористи кризата за евтини политички поени, не водејќи никаква грижа за граѓаните.

03.01.2022 - 09:18

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега