ФОТО: Македонски железници добија 107 нови товарни вагони
Возниот парк на Македонски железници е збогатен за нови 107 товарни вагони, кои денеска беа промовирани. До крајот на месецот се очекува да бидат испорачани и останатите 43 вагони од словачката „ЖОС Трнава“, со што ќе се заокружи набавката вредна 13,2 милиони евра.
Премиерот Никола Груевски, кој заедно со вицепремиерот и министер за финансии Зоран Ставрески и министерот за транспорт и врски Миле Јанакиески, присуствуваа на прмоцијата, истакна дека набавката на овие вагони е дел од стратегијата на Владата за целосна санација и ревитализација на македонскиот железнички систем.
- Ако нашиот граѓанин се подразмисли кога последен пат во Македонија се купиле и ставиле во функција нови возови, односно нови транспортни вагони... најверојатно нема да бидат многумина кои би се сетиле на таков настан. Тоа е резултат на начинот на кој беше третирана железницата и железничкиот сообраќај во поновата историја на Македонија, истакна Груевски.
Тој нагласи дека во јули треба да пристигнат и првите од шесте гарнитури на патнички возови, кои чинат околу 25 милиони евра.
- Покрај нови возови, Македонија ќе добие и нови железнички станици. Реконструкцијата на железничката станица во Скопје е во тек и очекуваме да заврши ова лето. Покрај скопската железничка станица ќе се работи и на модернизација на железничките станици во Велес, Прилеп, Битола, Гевгелија, Богомила, Чашка, Табановце, Демир Капија, Градско и Неготино, додаде Груевски.
Премиерот потсети дека минатата година започна изградбата на железничката пруга кон Бугарија и информираше дека активно се работи и на проширување на железничката мрежа кон Албанија
Ставрески нагласи дека набавката на новите товарни вагони произлегла од барањата на бизнисмените.
- Купувањето на нови товарни вагони беше едно од барањата на бизнис заедницата и ова е потврда како Владата работи со бизнисмените во текот на овие девет години. Секогаш кога има аргументирано барање, ние наоѓаме средства и начин тоа да го вклопиме во буџетите и да го реализираме и да и излеземе во пресрет на бизнис заедницата, истакна Ставрески.
Додаде дека инвестицискиот циклус во железницата во моментот изнесува 281 милион евра од кои 145 милиони евра е втората фаза од реконструкцијата на пругата кон Бугарија, а 50 милиони се за набавка на новите вагони. Покрај тоа, со ИПА средства се врши и изградбата на реконструкцијата од Битола до Кременица и реконструкцијата на железничката станица во Скопје и другите железнички станици.
- Се работи за сериозен инвестициски циклус во кој никогаш претходно немало издвоено средства. Сето ова создава поконкурентна економија затоа што со вакви вагони, со современ превоз и подобри пруги ќе ги намалиме трошоците за македонските компании и ќе овозможиме да се зголеми транспортот на стока и патници, рече Ставрески.
Според министерот за транспорт, со оваа нова инвестиција Македонски железници ќе се етаблира и на меѓународниот пазар како компанија која е подготвена да понуди брз и сигурен транспорт.
- Инвестицијата вредна 13,2 милиони евра, не само што ќе придонесе за поголема ефикасност на оваа железничка компанија, тоа ќе значи и нов почеток во насока на нудење на квалитетни услуги на коминтентите со кои соработува. Практично, набавката на 150-те вагони беше едно од барањата на бизнисмените, но дел и од нашата програма, со кои низ долги разговори и преговори ни укажуваа дека за да се задоволат нивните потреби за брз транспорт неопходна е една ваква инвестиција. Тоа и го сторивме. Од денеска бизнис секторот може да биде сигурен дека МЖ Транспор во иднина ќе нуди поквалитетен превоз на стоки, подвлече Јанакиески и додаде дека, од денес Македонски железници Транспорт ја пишува новата историја на компанијата.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа