„Пристап до информации и заштита на лични податоци-можности и предизвици“

Конференција на тема „Пристап до информации и заштита на лични податоци – можности и предизвици“ ќе се одржи денеска во Скопје.

Со конференцијата ќе биде означаен почетокот на проектот „Транспарентни и ефикасни државни регулаторни и надзорни тела“, каде истражувачи на „Аналитика“ ќе ја следат работата на Комисијата за заштита на правото на пристап до информации од јавен карактер како и на Дирекцијата за заштита на лични податоци преку објавување квартални извештаи. На настанот ќе бидат преставени одредниците за претстојните извештаи.

Целта на проектот е зголемена јавна контрола преку следење на работата на овие две тела со единствена цел подобрување на нивните перформанси, ефективност, транспарентност како и отчетност што треба да придонесе за воспоставување отчетен јавен сектор. 

Проектот е поддржан од Британската Амбасада во Скопје и ќе се спроведува до крајот на март 2018 год.

На конференцијата се најавени обраќања на Пол Едвардс, заменик амбасадор во Британската амбасада во Скопје и Магдалена Лембовска, истражувач за безбедносни прашања во „Аналитика“. Ќе учествуваат и претставници на Комисијата за заштита на правото на пристап до информации од јавен карактер, на Дирекцијата за заштита на лични податоци, експерти од Обединетото Кралство, како и претставници на невладиниот сектор и академската заедница.