Германскиот државен министер за Европа, Рот во понеделник во Скопје
Германскиот државен министер за Европа во понеделник доаѓа во Скопје на средби со претставници на власта и опозицијата. Како што најави германското МНР, централна тема на состаноците ќе биде договорот со Грција.
Михаел Рот ќе биде првиот висок претставник од земјите-членки на ЕУ кој доаѓа во Скопје во пресрет на очекуваниот референдум за промена на името најавен за наесен. Најавени се средби на државниот министер со премиерот и вицепремиерот Зоран Заев и Бујар Османи, со министерот за надворешни работи Никола Димитров како и со лидерот на опозициската ВМРО-ДПМНЕ, Христијан Мицкоски.
Од германското МНР наведуваат дека посетата на Рот на Скопје доаѓа еден месец по потпишувањето на договорот за решавање на спорот за името меѓу Македонија и Грција и потенцираат дека токму спроведувањето на овој договор ќе биде централна тема на состаноците, покрај разговорите за спроведувањето на неопходните реформи во земјата.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа