Разрешени министрите на Алтернатива: Познато е колкаво е владејачкото мнозинство

Пратениците ги разрешнија министрите на Алтернатива со што јавноста конечно дозна колку пратеници има владејачкото мнозинство. Министерот за здравство, Беким Сали беше разрешен со 65 гласа „за“, додека останатите двајца министри со 64 гласа „за“. Скендер Реџепи е единствениот пратеник од владејачкото мнозинство кој не го поддржа разрешувањето на Адмирим Алити од Министерството за информатичко општество и администрација и Џемаил Чупи, министер без ресор задолжен за дијаспора. Но, Скендер Реџепи е независен пратеник кој ја напушти пратеничката група на Алтернатива уште лани, а ќе го поддржува владејачкото мнозинство во Законодавниот дом.

Седницата за разрешување и именување нови членови на Владата започна пред десет дена, на 13 февруари. На дневен ред се четири точки, а разрешувањето на тројцата министри е само првата точка. Тоа значи дека сега допрва ќе се дискутира и гласа за избор на нови владини членови, што е втора точка на дневниот ред. Со изборот на нови министри треба да се пополнат местата на Сали и Алити, како и на поранешниот министер за правда Никола Тупанчески и за животна средина и просторно планирање Насер Нуредини. За разрешувањето на Тупанчески и Нуредини не се дискутираше затоа што тие сами ги поднесоа оставките како резултат на договорот за влез на Алијанса за Албанците во Владата и прераспределба на ресорите, па затоа Собранието само им ги констатираше оставките. Новите министри кои треба да се изберат на нивно место се: Кренар Лога (Алијанса) – министер за правда; Фатмир Меџити (Алијанса) – министер за здравство; Азир Алиу (Алијанса) – министер за информатичко општество и администрација; и Каја Шукова (СДСМ) – министерка за животна средина и просторно планирање.