Sвездата на серијата „Сулејман Величенствениот“ осуден на казна затвор

Познатиот турски актер Халит Ергенч, познат по улогата Сулејман Величествениот во турската хит серија, доби условна затворска казна поради лажно сведочење во врска со организацијата на протестите во паркот Гези во 2013 година.

Според пишувањето на турските медиуми, судот во Истанбул го осудил Ергенч на казна затвор поради „обид за соборување на турската влада“ и „попречување на нејзините функции“.

Случајот беше отворен откако обвинителите ги повикаа Ергенч и актерот Риза Коџаоглу на друга судска постапка во која е вклучена познатата агентка за таленти Ајше Барим, која е во притвор од јануари под обвинение за обид за соборување на турската влада.

Барим наводно им наложила на актерите што ги застапувала јавно да ги поддржат протестите во паркот Гези.

Во текот на судењето, Ергенч тврдел дека немал никаков контакт со обвинетите организатори на протестите, вклучувајќи ги Мемет Алабора и Ајше Барим. Сепак, истражителите пронашле докази што укажуваат на неговата поврзаност со нив. Покрај тоа, постојат снимки што го покажуваат неговото присуство на протестите.

Ергенч е осуден на една година, 10 месеци и 15 дена затвор, додека Коџаоглу добил една година и осум месеци. Сепак, судот го одложи објавувањето на пресудата, што значи дека казните нема да бидат извршени освен ако актерите не сторат ново кривично дело. И двајцата актери ги негирале обвиненијата и побарале ослободителна пресуда во текот на рочиштето.

Пресудата предизвика меѓународна осуда, а организации како што е „Амнести интернешнл“ побараа обвиненијата да бидат отфрлени и сите затвореници поврзани со протестите во Гези да бидат ослободени.

Халит Ергенч е почитуван актер во Турција, а доби меѓународна популарност благодарение на неговите улоги во сериите „Илјада и една ноќ“ и „Сулејман Величествениот.