Џафери ги договара активностите на Собранието - заостана Законот за јазиците

Во Собранието на Република Македонија претседателот Талат Џафери одржува средба со координаторите на пратеничките групи на која треба да се утврди редоследот на активности на Парламентот за неделава. Поради службени патувања Собранието немаше пленарни активности во изминатите две недели.

Заостанати се законот за јазиците за кој ВМРО-ДПМНЕ има поднесени 35.569 амандмани, реформските закони за следење на комуникациите, законите за намалување на патните трошоци и друго.

Нема официјални информации ниту како партиите ќе го надминат проблемот со блокадата што ја предизвика бројноста на амандманите на Законот за јазиците. Претседателот на Парламентот Џафери пред неколку недели кажа дека се надева на политички договор, но дали има резултат од обидите за постигнување некаков договор ќе се знае откако ќе биде закажана агендата на Парламентот за неделава и чекорите што ќе бидат преземени од страна на парламентарните групи.